14 август- Қурилиш соҳаси ходимлари куни!

ЙЎЛЛАР ОБОД – ДИЛЛАР ОБОД

Мамлакатимизда сўнгги йилларда йўлсозлик соҳасини ривожлантириш, йўлларни халқаро талаблар даражасида бунёд этишга алоҳида эътибор қаратилмоқда. Йўлсозлар томонидан замонавий йўл, йўл ўтказгич, кўприк, пиёдалар учун ер ости ва ер усти йўллари ва йўлаклари барпо этилаётгани аҳолининг узоғини яқин қилиб, ҳаракат хавфсизлигини таъминлашга муҳим аҳамият касб этаётир. 

Август ойининг иккинчи якшанбаси - 14 август - Қурилиш соҳаси ходимлари куни. Бу санани мамлакатимиз йўлсозлари ҳам касб байрами сифатида кенг нишонлайди.

Шу муносабат билан соҳада амалга оширилаётган қурилиш ва бунёдкорлик ишлари ўзига хос сарҳисоб қилиниб, қўлга киритилаётган ютуқлар қайд этилади, долзарб вазифалар белгилаб олинади. Тармоқда фаолият олиб бораётган мутахассислар рағбатлантирилади. Янги йўлларни қуриш, мавжудларини таъмирлашга оид лойиҳаларни тайёрлаш, йўл қурилиш материалларини ишлаб чиқариш, соҳага инвесторларни кенг жалб қилиш бунда муҳим аҳамият касб этади.

Давлатимиз раҳбарининг шу йил 28 январдаги фармонига биноан тасдиқланган ва жадаллик билан амалга оширилаётган 2022 — 2026 йилларга мўлжалланган Янги Ўзбекистоннинг тараққиёт стратегиясида мамлакатимизда йўл инфратузилмасини янада такомиллаштириш ва йўлларда хавфсиз ҳаракатланиш учун барча иштирокчилар учун муносиб шароитларни яратишга алоҳида эътибор қаратилган.

Гап йўл ҳақида кетар экан, бир муҳим ўзгаришни алоҳида таъкидлаш ўринли: шаҳар-қишлоқларимиздаги аввалги йўллар билан бугунгисини асло таққослаб бўлмайди. Бир пайтлар қишда лой, ёзда чангдан ”боши” чиқмаган кўчалар бугун ойнадек товланиб, йўловчилар узоғини яқин қиляпти. Йўллар янгидан-янги манзилларга туташмоқда, кенгайтирилиб, реконструкция қилинмоқда. Йўлсозларимизнинг бундай ютуқлари замирида эса йўл лойиҳалари яратувчиларининг ҳам муносиб ҳиссаси бор.

Айни пайтда, “Йўл лойиҳа бюроси” масъулият чекланган жамияти жамоаси томонидан юртимизнинг барча худудларида иннавацион йўл лойиҳалари асосида қурилиш – таъмирлаш ишлари бажарилмоқда.

    Бу борада пойтахтимизда амалга оширилаётган бунёдкорлик ишлари айниқса эътиборга молик.  Жумладан, бош кентимизнинг Мирзо Улуғбек туманидаги Иброҳим Мўминов кўчасини қайта қуриш ва ободонлаштириш объектининг ишчи лойиҳаси Ўзбекистон Республикаси  Вазирлар Маҳкамасининг 2021 йил 2 октябрдаги қарори асосида ишлаб чиқилганди.

Лойиҳалашдан мақсад мазкур кўчани пойтахтимизнинг замонавий қиёфасига мослаштириш, ободонлаштириш, йўл ҳаракатининг барча иштирокчилари учун қулайлик яратишдан ибора эдики, бундай  имкониятларни яратиш осон кечмаслиги аён, албатта. Зеро, айрим фуқаролар ўзбошимчалик билан ерларни ва йўлакларни ўзлаштириб олганлиги оқибатида кўча анча торайиб қолган. Нафақат автомабиллар, балки пиёдаларнинг юриши қийинлашиб,  бир-бирига ҳалақит бериши ва тирбандликлар юзага келиши,  автоҳалокатлар содир бўлиши билан боғлиқ ҳодисалар кўпайган эди.   Пиёдаларнинг ўтиш йўлаги эса умуман бўлмаган.

Шу сабабли йўлсозлик соҳасидаги бош лойиҳалаш ташкилоти - “Йўл лойиҳа бюроси” МЧЖнинг лойиҳа бўлими бошлиғи Шоҳруҳ Оқилов раҳбарлигида ушбу объектнинг мураккаб лойиҳавий ечими ишлаб чиқилди ва муваффақиятли амалга оширилди.

Янги барпл этилган велосипед йўлакчаси замонавий стандартларга мос равишда чиройли брусчаткалар билан қопланиб,  замонавий ёритиш тизими билан жиҳозланди.  Кўкаламзорлаштириш ва чиройли дарахтлар экиш,  автотураргоҳ жойларини  барпо этиш ишлари ҳам лойиҳачилар назаридан четда қолмади.

Юнусобод туманидаги “Собиробод” маҳалла фуқаролар йиғини ҳудудидаги “Уч қаҳрамон” кўчасини тўла таъмирлаш ишлари ҳам лойиҳачилар томонидан қисқ муддатларда ва сифатли адо этилганлигини алоҳида таъкидлаш жоиз. Ушбу торайиб қолган кўчадан қатновчи автоуловлар  ҳам бир бирига ҳалақит берарди. Йўллар ёмғиру қордан ўйилиб, чуқурлар кўпайган. Пиёдаларнинг юриши учун йўлак йўқ эди.

Йўлсозлар реконструкция ва таъмирлаш ишларини тасдиқланган лойиҳа асосида  олиб боргани муваффақиятлар гарови бўлди. Эндиликда бу кўчадан юрган йўловчию пиёданинг баҳри дили очилади. Асфальтбетон қопламали олтита қатнов тасмасидан иборат кўча сезиларли даражада кенгайган ва замонавий қиёфа касб этган.

Бу кўчада ҳам велосипед йўлакчасига жой ажратилиб, замонавий стандартларга мос чиройли брусчаткалар тўшалди. Замонавий ёритиш тизими тунларни кундузгидек нурафшон қилиб турибди. Йўллар равон,  кенг ва  ёруғ.

Йўлсозларимизнинг бунёдкорлик ишларида уларга камарбаста бўлаётган лойиҳачиларимизнинг бундай эзгу ишларига яна кўплаб мисоллар келтириш мумкин.

  Буларнинг барчаси инсон қадри тобора юксалаётган  мамлакатимизда йўлсозлик соҳасини ривожлантириш, йўл-қурилиш технологияларини модернизация қилиш, автомобиль йўлларини бошқариш тизимини такомиллаштириш ҳамда замонавий, қулай, хавфсиз, равон ва иқлим ўзгаришларига бардошли йўлларнинг барпо этилишига, халқимиз фаровонлигининг янада юксалишга хизмат қилмоқда.

Лобар ОЧИЛОВА