Умрга татигулик йўл

2025 йил 15 январь куни “YO`L-LOYIHA BYUROSI” масъулияти чекланган жамияти ва Ўзбекистон автомобиль йўлчилари ассоциацияси ҳамкорликда “EDU MASTER”  конференц-залида сунъий иншоотлар бўйича бош конструктор Владислав Николаевич Соколовнинг 85 йиллик юбилейига бағишланган тадбир ўтказилди. Тадбирда нафақат Ўзбекистоннинг барча вилоятларидан, балки собиқ МДҲ давлатларидан ҳам меҳмонлар иштирок этишди.

          Соколов Владислав Николаевич 1940 йил 15 январда Самарқанд шаҳрида туғилган. Ўзининг кўп йиллик меҳнат фаолиятини 1957 йилда “Узгипроавтодор” республика лойиҳа-қидирув институтида шогирд, нусха кўчирувчи ишчи, муқоваловчи, муқовалаш устахонаси мудири ва кўприк бўлими катта техниги лавозимларида бошлаган.

          1959 йилда Тошкент темир йўл транспорти институтининг кечки бўлимига ўқишга кирган. Институтнинг V курсида 1964 йилда Совет Армияси хизматига чақирилган.

          Армия хизматидан қайтгач, 1967 йилда  “Узгипроавтодор” республика лойиҳа-қидирув институтининг кўприк бўлимига муҳандис лавозимига ишга кирган. Тошкент темир йўл транспорти институтини тугаллагандан сўнг 1968 йилдан 1992 йилга қадар катта муҳандис, гуруҳ раҳбари, бош мутахассис, кўприк бўлими бошлиғи, йўл-кўприк бўлими бошлиғи лавозимларида фаолият кўрсатган.

          Ўтган давр ичида институт «Узгипроавтодор», «Узйўллойиҳа», «Узремдорпроект» ва, ниҳоят, «YO`L-LOYIHA BYUROSI» МЧЖ деб бир неча бор қайта номланган бўлиб, В.Н.Соколов доимо кўприк бўлими бошлиғи сифатида ишлаган ҳамда ўзини билимли, қобилиятли, виждонан ишлайдиган, ташаббускор, бажараётган ишига ижодий ёндашадиган мутахассис сифатида намоён этган.

В.Н.Соколов кўп сонли лойиҳалар ва қурилган иншоотларнинг муаллифи ҳисобланиб, қуйидаги энг йирик ва мураккаб объектларни айтиб ўтиш лозим:

          Нукусда Амударё устидан ўтган кўприк, Пунган, Поп ва Бекобод шаҳридаги Шанад қишлоқларида Сирдарё устидан ўтган кўприклар, Қарши шаҳрида Чироқчи ва Косон қишлоқлари яқинида Қашқадарё устидан ўтган кўприклар, Чорвоқ ГЭС қуйи бъефида Чирчиқ дарёси устидан ўтган кўприклар, Самарқанд, Тошкент, Жиззах шаҳарларидаги йўл ўтказгичлар ва кўпгина бошқа иншоотлар.

          В.Н.Соколов жамоа ижтимоий ҳаётида фаол иштирок этади, институт ва Вазирликнинг Фахрий ёрлиқлари билан, Ҳукумат томонидан “Меҳнат фахрийси”, “Меҳнат жасорати учун” медали, “Қорақалпоғистон Республикасида хизмат кўрсатган қурувчи” мукофотлари билан тақдирланган.